Bütün xəbərlər
Metropolitenin “Nərimanov” elektrik deposunda yeni elektrik yarımstansiyası istifadəyə verilib
Tarix: 08-01-2018 14:26 | Bölmə: Sosial

Metropolitenin lokomotiv parkının, eləcə də əsas istehsalat sahələrinin yerləşdiyi “Nərimanov” elektrik deposunda yeni elektrik yarımstansiyası istifadəyə verilib.
AZƏRTAC xəbər verir ki, bu barədə “Bakı Metropoliteni” QSC-nin mətbuat xidmətindən məlumat verilib.
Bildirilib ki, bununla metropolitenin infrastrukturunun fəaliyyətini təmin edən ən mühüm istehsalat, təmir-bərpa sahəsi olan deponun elektrik təchizatı ən müasir standartlar səviyyəsinə qaldırılıb.
Son illər depo ərazisində aparılan yenidənqurma işləri, yeni təmir-istismar, xüsusən istehsalat sahələrinin yaradılması böyük dəyişiklikləri zərurətə çevirib. Çünki depo ərazisində 1967-ci ildən kiçik və dar məkanda fəaliyyət göstərən iki elektrik yarımstansiya istismar dövrünü başa vuraraq mövcud istehlakçı tələbinə cavab verməyib.
Bu səbəbdən “Bakı Metropoliteni” QSC-nin strukturuna daxil olan “Bakımetrolayihə” İnstitutunun layihəsi əsasında yeni yarımstansiya inşa olunaraq məsələnin həllinə kompleks şəkildə yanaşılıb. Həm də metropoliten tarixində ilk dəfə yarımstansiyada yalnız bir tərəfdaş şirkətin - dünyada bu sahədə tanınmış şirkətlərdən biri olan “Siemens”in avadanlıqları quraşdırılıb. Bununla da fərqli avadanlıqların bir sistemin tələblərinə uyğunlaşdırılmasına ehtiyac qalmır, həmçinin onların istismarı və qulluğunu daha səmərəli şəkildə təşkil etməyə imkan verir.
İstismar müddətini başa vurmuş əvvəlki yarımstansiyada 1000 kilovat gücündə üç transformator var idisə, yenisində eyni texniki parametrli, lakin daha müasir 1000 kilovatlıq iki və bir o qədər də 630 kilovatlıq yeni transformator quraşdırılıb. 1000 kilovatlıq transformatorlar güc, 630 kilovatlıq avadanlıqlar isə işıqlandırma şəbəkəsinin tələblərini ödəmək üçün nəzərdə tutulub. Bu iki şəbəkənin bir-birindən ayrılması metropoliten üçün vacib məsələ olmaqla, elektrik təchizatının sabit və etibarlığını daha yüksək səviyyədə təmin etməyə imkan verir.
Yeni yarımstansiyada 6 kilovoltluq komplekt və 4 ədəd 0,4/0,23 kilovoltluq paylayıcı qurğular qoyulub. Paylayıcı qurğuların mühüm üstünlüyü avtomat mexanizmli bölmələrdən ibarət olmasıdır. Həmçinin bu bölmələrin yerindən çıxarılaraq yenisi ilə əvəzlənməsi də gələcək perspektiv baxımdan əhəmiyyətlidir.
Sahədə qoyulmuş helium tərkibli və hermetik akkumulyatorlar, quraşdırılmış yeni sabit cərəyan lövhəsi, qəza-işıqlandırma bölməsi, həmçinin müvafiq normalara uyğun ventilyasiya sistemi müasir standartların tələblərinə cavab verir.
İdarəetməni həyata keçirən mikroprosessor sistemli telemexanika şkafı müasir dövrün məhsuludur. Dövrün tələblərinə uyğun qurulan avtomatik iş yeri ilə yanaşı, bütün sistemin dispetçer idarəetməsinə tabe edilməsi də uğurla həllini tapıb.
Depo ərazisində mövcud olan digər alçaldıcı yarımstansiyanın yeni əsaslarla qurulması da davam etdirilir. Lokomotiv təsərrüfatının ehtiyaclarını ödəyəcək, həmçinin depo və park yollarındakı işıqforların və digər işarəvermə qurğularının elektrik cərəyanı ilə təmin edilməsinə xidmət göstərəcək bu yarımstansiya ilə “Nərimanov” elektrik deposunun elektrik təchizatı ən mükəmməl şəkildə təmin edilmiş olacaq.


Baxış sayı: 857


Bölməyə aid digər xəbərlər